KQZ shpall rezultatin përfundimtar të zgjedhjeve për Kryetarin e Komunës Fajzë, Qarku Kukës, të datës 19.03.2006

Në datë 19.03.2006, në Komunën Fajzë të Qarkut Kukës, u zhvilluan zgjedhjet për Kryetarin e Komunës. Partia Socialiste e Shqipërisë i kërkoi KQZ-së shpalljen e pavlefshme të zgjedhjeve në dy qendra votimi të kësaj njësie zgjedhore. KQZ me vendimin nr. 44, datë 31.03.2006 vendosi rrëzimin e kësaj kërkese.

Vendimi i KQZ-së u ankimua nga Partia Socialiste e Shqipërisë në Kolegjin Zgjedhore në Gjykatën e Apelit Tiranë. Kolegji Zgjedhor në Gjykatën e Apelit Tiranë vendosi në datë 11.04.2006 mospranimin e kërkesës së Partisë Socialiste të Shqipërisë dhe lënien në fuqi të Vendimit nr. 44, datë 31.03.2006 të KQZ-së.

Komisioni i Zgjedhjeve për Qeverisjen Vendore të Komunës Fajzë ka vendosur të miratojë rezultatin e zgjedhjeve për kandidat për kryetar të Komunës Fajzë dhe të shpall fitues z. Jakup Xhem Sefolli kandidat i mbështetur nga Partia Demokratike.

Pas përfundimit të gjithë procedurave ligjore të lidhura me zgjedhjet në Komunën Fajza, Komisioni Qendror i Zgjedhjeve më datën 13.04.2006 shpalli rezultatin përfundimtar të zgjedhjeve sipas rezultatit të nxjerrë nga KZQV e Komunës Fajza, Qarku Kukës

KQZ miraton Raportin Vjetor për vitin 2005

Komisioni Qendror i Zgjedhjeve ka miratuar Raportin Vjetor të veprimtarisë së institucionit për vitin 2005. Raporti do të paraqitet në Kuvendin e Shqipërisë, në përputhje me dispozitat e Kodit Zgjedhor.

Në këtë Raport të KQZ-së për vitin 2005, paraqitur Kuvendit të Shqipërisë, pasqyrohet veprimtaria e këtij institutcioni lidhur me përgatitjen, zhvillimin, administrimin dhe shpalljen e rezultatit të zgjedhjeve për Kuvendin e Shqipërisë të datës 3 Korrik 2005.

Të konsideruara si një proçes rezultati i të cilit, do të kishte peshën kryesore në proçesin për nënshkrimin e Marrveshjes së Stabilizim Asocimit dhe progresit në përgjithësi të shoqërisë shqiptare, ai pati gjithë vëmendjen dhe angazhimin e plotë profesional dhe qytetar të KQZ-së.

KQZ duke respektuar Kushtetutën dhe Kodin Zgjedhor bëri të gjitha përpjekjet që këto zgjedhje të ishin jo vetëm një progres i radhës sikurse kanë qënë të tilla nga viti 2000 e vazhdim, por edhe të arrinin standartet e zgjedhjeve të vendeve me demokraci të zhvilluar dhe të konsoliduar prej vitesh.

Zgjedhjet e 3 Korrikut 2005 edhe pse arritën për herë të parë disa standarte për zgjedhje sipas përcaktimeve në dokumentet e OSBE-së dhe KE-së, treguan edhe një herë se interesi politiko-elektoral dominon shpesh jo vetëm interesin por edhe detyrimin për të respektuar rregullat dhe normat kushtetuese dhe ligjore që garantojnë një proçes të lirë dhe të drejtë.