KOMISIONI QENDROR I ZGJEDHJEVE

DEKLARATË PËR SHTYP

[Tiranë, më 26-12-2006]

Komisioni Qendror i Zgjedhjeve me vendimin nr.129 dt.08.12.2006 ka vendosur “Detyrimin e Drejtorisë së Përgjithshme të Gjendjes Civile dhe Kryetarëve të Njësive të Qeverisjes Vendore të dërgojnë, përditësojnë, miratojnë dhe shpallin listën e zgjedhësve për zgjedhjet për organet e qeverisjes vendore të datës 20.01.2007, sipas afateve të sanksionuara në nenin 60/1 të ligjit nr.9087 dt.19.06.2003 “Kodi Zgjedhor i Republikës së Shqipërisë”, i ndryshuar”, dhe me vendimin nr.130 dt.08.12.2006 ka vendosur “Kryetarët e Njësive të Qeverisjes Vendore të dërgojnë në KQZ, jo më vonë se data 26 Dhjetor 2006, të dhënat për numrin total të qendrave të votimit, vendndodhjen e çdo qendre votimit së bashku me numrin përkatës të zgjedhëesve në listën përfundimtare”.

Pikërisht sot, më dt. 26.12. 2006, është afati i fundit për dërgimin e informacionit në KQZ, informacion ky i domosdoshëm për përmbylljen e operacioneve zgjedhore. Rezulton se drejtuesit e pushtetit vendor nuk i kanë zbatuar këto vendime dhe veçanërisht Vendimin nr.130, për dërgimin e informacionit në KQZ, i cili është edhe një detyrim i drejtëpërdrejtë. Nga 384 njësi vendore rreth 15 të tilla i janë përgjigjur negativisht Komisionit për të zbatuar vendimet e tij, ndërkohë që ka njësi që po dërgojnë informacion, ndërsa mjaft të tjera nuk kanë kthyer asnjë përgjigje.

U bëj thirrje drejtuesve të pushtetit vendor të zbatojnë vendimet e KQZ-së dhe të sjellin informacionin e kërkuar, në të kundërt KQZ ka kompetencën dhe detyrimin të marrë masa administrative konform nenit 178 dhe 179 të Kodit Zgjedhor, madje të denoncojë për ndjekje penale këta drejtues.

Gjithashtu u bëj thirrje partive që kanë detyrimin të paraqesin komisionerë për KZQV-të, të plotësojnë detyrimet e tyre në të kundërt do t'i kërkoj Komisionit Qendror të Zgjedhjeve marrjen e masave administrative. Edhe një herë theksoj faktin se KQZ ka impenjimin e plotë për të organizuar zgjedhjet më dt. 20 Janar, si një detyrim kushtetues dhe ligjor i yni.

ÇLIRIM GJATA
_________________
KRYETAR
Komisioni Qendror i Zgjedhjeve

DEKLARATË PËR SHTYP

[Tiranë, më 20.12.2006]

Sot përfundon afati për paraqitjen e dokumentacionit nga kandidatët për kryetar bashkie ose komune, si dhe i listave për këshillat respektivë për zgjedhjet për organet e pushtetit vendor.
Me shumë shqetësim vihet re se shumë kandidatë, si ata të mbështetur nga partitë ashtu dhe të pavarur, por edhe vetë partitë nuk arrijnë të regjistrohen për shkak të mos ngritjes së KZQV-ve. Shkak për këtë është mosparaqitja nga ana e një pjese të partive parlamentare e propozimeve në KQZ, për emërimin e anëtarve të KZQV-ve. Ky qëndrim bllokon procesin duke penguar subjektet në garë dhe duke cënuar të drejtën e qytetarëve për të votuar.
Prej kohësh KQZ u kishte bërë thirrje forcave politike që kanë detyrimin kushtetues e ligjor për të paraqitur propozimet e tyre për ngritjen e KZQV-ve, por dhe në këtë moment një pjesë e subjekteve politikë paralamentarë që kanë këtë të drejtë dhe detyrim, nuk kanë ndërmarrë asnjë veprim.
Një fakt i tillë, si dhe mos deklarimi nga njesitë vendore i numrit të votuesve dhe numrit të qendrave të votimit, kanë qenë një pengesë serioze në punën e Komisionit, i cili edhe pse në kushtet e një situate të paprecedentë është përpjekur maksimalisht të relaizojë detyrimet e tij kushtetuese e ligjore.
Por ajo që dua të ngre në vëmendjen e të gjithë faktorëve dhe të opinionit publik është fakti se mos ngritja e KZQV-ve nuk ka qenë një pengesë serioze vetëm në punën e Komisionit.
Është në rradhë të parë një pengesë për të gjithë ata individë apo subjekte politikë që dëshironin të merrnin pjesë në këtë garë. Janë rreth 40 subjekte politikë parlamentarë dhe jo parlamentarë apo edhe te pavarur, të cilët në këtë çast janë të përjashtuar "a priori" nga e drejta për të marrë pjesë në votime pasi nuk ishte e mundur ngritja pikërisht e komisioneve të niveleve të dyta, pranë të cilave ata mund të regjistroheshin.

Por kjo është vetëm njëra anë e medaljes. Mosngritja e KZQV-ve është një goditje e fortë që i jepet procesit zgjedhor në tërësi në Shqipëri. Është një shkleje e rëndë që cënon vullnetin e qyetarëve për të marrë pjesë në votime, për të ushtruar të drejtën e votës. Duke cënuar pikërisht këto të drejta, në thelb, qëndrime të tilla godasin rëndë demokracinë në vend, Kushtetutën dhe detyrimet ligjore që burojnë prej saj dhe, duke patur parasysh fazën në të cilën ndodhemi, goditet rëndë dhe imazhi i Shqipërisë, në përpjekjet e saj për integrimin euroatlantik.
Çfardo justifikimi apo pretendimi është totalisht minor para këtij fakti kokfortë, i cili krijon një precedent shumë të rëndë në konsolidimin e demokracisë. Zhvillimet demokratike në vend, në asnjë mënyrë nuk mund të vijnë duke cënuar Kushtetutën, ligjin, Kodin Zgjedhor apo dhe të bëhen peng e trilleve apo lojrave politike.

Pavarësisht të gjitha fakteve të përmendura më lejoni të konfirmoj faktin se KQZ do të vazhdojë punën me rigorozitet, me shumë përgjegjësi, konform të gjitha detyrimeve kushtetuese dhe ligjore që ka per organizimin e procesit.
Edhe pse situata mund të duket paradoksale, më duhet të pohoj se Komisioni ka një datë për mbajtjen e zgjedhjeve të dekretuar nga Presidenti i Republikës dhe do të bëjë gjithçka varet prej tij për të përmbushur këtë detyrim kushtetues e ligjor.

ÇLIRIM GJATA
_________________
KRYETAR
Komisioni Qendror i Zgjedhjeve

DEKLARATË PËR SHTYP

[Tiranë, më 03.12.2006]

Vetëm një ditë më parë Presidenti e Republikës dekretoi datën e Zgjedhjeve për Organet e Qeverisjes Vendore. Edhe pse i ndodhur para një rasti tepër të veçantë, me hije të forta dyshimi në lidhje me faktin se a do të zhvilloheshin zgjedhjet në afatin e tyre ligjor, Komisioni Qendor i Zgjedhjeve ka vazhduar punën normalisht. Duke patur si pikë të vetme referimi, Kushtetutën, Kodin Zgjedhor dhe ligjet e tjera që lidhen me to, janë ndërmarrë të gjitha hapat për përgatijen e zhvillimit normal të Zgjedhjeve Vendore. Tregues më i mirë i këtij fakti janë një numër prej rreth 50 aktesh, vendime dhe udhëzime të miratuara nga Komisioni gjatë gjithë kësaj periudhe. Më lejoni të deklaroj publikisht, se këto akte janë miratuar në respektim rigoroz të afateve të përcaktuara në Kodin Zgjedhor, ku si më kryesorët do të veçoja:

• Vendim për miratimin e buxhetit për zgjedhjet vendore
• Vendim për caktimin e partive që kanë të drejtë të paraqesin propozime për anëtarë të komisioneve zgjedhore për qeverisjesn vendore (KZQV)
• Vendim për caktimin e procedurës së shortit dhe shpalljen e rezultatit të shortit për anëtarin e shtatë të KZQV
• Vendim për miratimin e modeleve që përdoren nga kandidatët për kryetar bashkie apo komune në procesin e regjistrimit të tyre në KZQV
• Vendime për miratimin e modeleve që standartizojnë punën e KZQV-ve dhe KQV-ve në një proces zgjedhor
• Vendim për miratimin e Strategjisë të KQZ për Marrëdhëniet me Publikun, në kuadër të edukimit zgjedhor të shtetasve në Zgjedhjet për Organet e Qeverisjes Vendore
• Vendime që kanë të bëjnë me logjistikën zgjedhore, ku përfshihen: modeli kutisë së votimit, modeli i dhomës së fshehtësisë, modelet e vulave që përdoren nga komisionet zgjedhore
• Miratimi i projekteve të trajnimit të KZQV-ve dhe KQV-ve dhe përgatitja e infrastrukturës logjistike për zhvillimin e tyre
• Miratimi i Manualit të Trajnimit të KZQV-ve (Pjesa e parë)
• Udhëzim për organizimin dhe funksionimin e KZQV-së
• Udhëzim për detyrat e policisë së shtetit dhe forcave të ushtrisë gjatë procesit zgjedhor
• Udhëzim për funksionimin e zyrave rajonale zgjedhore
• Udhëzim për procedurat e akreditimit të vëzhguesve, etj.

Gjithashtu është nënshkruar Memorandumi i Bashkëpunimit me Këshillin e Ministrave, si dhe Marrëveshja ndërinstitucionale e bashkëpunimit me Këshillin Kombëtar të Radios dhe Televizionit lidhur me monitorimin e fushatës zgjedhore.
Dua të shtoj se është standardizuar i tërë dokumentacioni që do të përdorin Komisionet e niveleve më të ulta zgjedhore në mënyrë që puna e tyre të jete sa më e thjeshtë. Gjithashtu, është në përfundim e sipër prodhimi dhe përpunimi i bazës materiale zgjedhore.

Vlen të nënvizoj faktin se bashkëpunimi me faktorin ndërkombëtar që vepron në Shqipëri, në veçanti prezencen e OSBE-së në Tiranë, si dhe Zyrën e USAID-it, ka qenë në parametra maksimalë dhe tepër frytdhënës. Mbetemi gjithmonë në gadishmëri për vazhdimin dhe thellimin e mëtejshëm të tij.

Pa dashur aspak të anashkaloj situatën tashmë të njohur është e nevojëshme të theksoj se Komisioni Qendor i Zgjedhjeve nuk ka patur gjatë kësaj periudhe bashkëpunimin e nevojshëm me faktorin politik. Reforma e vonuar, rekomanduar nga OSBE – ODIHR dhe faktorë të tjerë ndërkombëtarë, ka qenë një nga pengesat me seioze në punën tonë, por jo e vetmja. Pengesa të tjera që vonojnë apo rrezikojnë mosplotësimin e disa prej standardeve janë:

• Vonesa në ngritjen e Komisioneve të Zgjedhjeve për Qeverisjen Vendore (KZQV)
• Regjistrimi i partive apo dhe koalicioneve ne Komisionin Qendror te Zgjedhjeve, si kusht per te vazhduar regjistrimin ne njesite vendore te kandidateve dhe listave shumemerore.

• Afati për regjistrimin e kandidatëve dhe të listave shumemërore për anëtarë të këshillave vendore

• Përcaktimi i vendeve të numërimit të votave

• Ngritja e Komisioneve të Qendrave të Votimit (KQV-ve)

• Marrja e informacionit nga njësitë vendore në lidhje me numrin e zgjedhësve për çdo qendër votimi dhe vendndodhjen e tyre, e lidhur kjo drejtpëdrejtë me përgatitjen e bazës materiale zgjedhore për çdo QV dhe sidomos me prodhimin e flletëve të votimit.

• Organizimi i grupeve te numerimit ne pershtatje me specifikat e zgjedhjeve vendore. Numërimi i votave dhe respektimi i afatit ligjor për përfundimin e numërimit dhe shpalljen e rezultatit të zgjedhjeve, veçanërisht në bashkitë e mëdha.

• Mbi të gjitha bashkëpunimi dhe vullneti i partive politike për të kontribuar maksimalisht në zhvillimin e një procesi zgjedhor të rregullt, ligjor dhe brenda standardeve të njohura ndërkombëtare, të cilat aspirojmë të gjithë të prekim maksimalisht.

Pavarësisht të gjitha shqetësimeve që përmenda pak më sipër dua të shpreh vullnetin e plotë të Komisionit Qendror të Zgjedhjeve për zbatimin e të gjithë parametrave të nevojshëm, në organizimin dhe zhvillimin procesit zgjedhor, brenda të gjitha normave dhe akteve ligjore në fuqi. Përfitoj nga rasti për t’u bërë dhe njëherë apel të gjitha forcave politike për të bashkëpunuar ngushtë me Komisionin në këtë periudhë kohore të mbetur deri në datën e zgjedhjeve, pasi arritja e standardeve në këto zgjedhje është një sfidë e Shqipërisë dhe qyetetarëve të saj, dhe jo vetëm e Komisionit apo faktorit politik.
Çdo hap pozitiv i hedhur në procesin zgjedhor është një hap më pranë integrimit europian të vendit.

ÇLIRIM GJATA
_________________
KRYETAR
Komisioni Qendror i Zgjedhjeve